— സി. പി. കവാഫി വിരസമായ ദിവസത്തിനു പിന്നാലെ വരുന്നു
വിരസമായ മറ്റൊരു ദിവസം, ഒരു മാറ്റവുമില്ല.
ഒരേ കാര്യങ്ങൾ സംഭവിക്കുന്നു, ആവർത്തിക്കുന്നു.
അതേ നിമിഷങ്ങൾ വരുന്നു; പോകുന്നു.
ഓരോ മാസവും കടന്നുപോകുന്നു, മറ്റൊരു മാസമാകുന്നു.
വരാൻ പോകുന്നതെന്തെന്ന് ആർക്കും ഊഹിക്കാം:
എല്ലാം കഴിഞ്ഞ ദിവസത്തെ മുഷിപ്പുകൾ തന്നെ.
നാളെയാകുമ്പോൾ ഒന്നും നാളെയായി തോന്നുന്നില്ല.
സി. പി. കവാഫി (1863-1933): ഗ്രീക്ക് കവി. ഈജിപ്തിലെ അലക്‌സാൻഡ്രിയയിൽ 1863 ഏപ്രിൽ 29നായിരുന്നു കോൺസ്റ്റാന്റിൻ പീറ്റർ കവാഫിയുടെ ജനനം. ഒമ്പത് മുതൽ പതിനാറാം വയസ്സ് വരെ ഇംഗ്ലണ്ടിൽ കഴിഞ്ഞ കവാഫി, പിന്നീട് കോൺസ്റ്റാന്റിനോപ്പിളിലും ഫ്രാൻസിലും കുറച്ചുകാലം ജീവിച്ചു. 1885ൽ അലകസാൻഡ്രിയയിൽ തിരിച്ചെത്തി. അവിടെ ജലസേചന വകുപ്പിൽ ജീവനക്കാരനായി. ഇക്കാലത്താണ് കവിതയെഴുത്തിൽ സജീവമായത്. സ്വവർഗാനുരാഗവുമായി ബന്ധപ്പെട്ട ഓർമ്മകൾ, ഗ്രീക്ക് ചരിത്രത്തിന്റെയും പുരാണത്തിന്റെയും ഭാവനാപരമായ പുനരാഖ്യാനം, സാങ്കൽപ്പിക ഭാഷണങ്ങൾ എന്നിങ്ങനെ ചരിത്രപരവും തത്വചിന്താപരവും മനഃശാസ്‌ത്രപരവുമായ പ്രമേയങ്ങളാണ് കവാഫി കവിതകളുടേത്.
