— അഘ ഷാഹിദ് അലിനമ്മൾ മില്ലർ ലൈറ്റ്സ് മൊത്തിക്കുടിക്കുമ്പോൾ
നീ പറഞ്ഞു, ഒരു ഇടവേള ആവശ്യമെന്ന്.
പ്രിയപ്പെട്ടവളേ, നീ പോയി, ഞാൻ നിന്നും
പെണ്ണുങ്ങൾ ഇരുന്നും കാര്യം സാധിക്കുന്ന
ഒഴിഞ്ഞുനിൽക്കും ഇടങ്ങളിലേക്ക്.
നീ തിരിച്ചെത്തുന്നത് ആരുടെയോ ചുവരെഴുത്ത്
മനപാഠമാക്കിക്കൊണ്ടായിരുന്നു:
"ഞാൻ തനിച്ചാണെന്നത് ലോകമൊട്ടാകെ
വെളിപ്പെട്ട കാര്യം. ഓരോ ദിവസമൊടുങ്ങുമ്പോഴും
എൻ്റെ ചുണ്ടിലെ തിളക്കം അതേപടിതന്നെ."
അതിനുള്ള മറുപടി മറ്റാരോ കുത്തിക്കുറിച്ചിരുന്നു, ചുവപ്പിൽ:
"നിന്റെ ദുഃഖത്തിന്റെ സാക്ഷ്യം രഹസ്യദൂതർ തന്നിരിക്കുന്നു.
ലോകമൊട്ടാകെ കണ്ടിട്ടും ഞാൻ നിന്നെ കണ്ടില്ലല്ലോ"
ആണുങ്ങളുടേതിൽ നിന്നും ഒന്നും കിട്ടാതെ
മടങ്ങിവന്ന ഞാൻ നിന്നോട് പറയുന്നു,
ആ രണ്ടുപെണ്ണുങ്ങളും കണ്ടുമുട്ടണം
എന്നതാണെൻ്റെ ആഗ്രഹമെന്ന്.
എനിക്കവർ കണ്ടുമുട്ടിയേ തീരൂ
അതിപ്പോൾ ലോകമതെങ്ങനെയായാലും.
(നാൻസി മക്ഗാർട്ട്ലാൻഡിന്)
"Poets on Bathroom Walls" from The Veiled Suite: The Collected Poems by Agha Shahid Ali
അഘ ഷാഹിദ് അലി (1949-2001): കാശ്മീരി-അമേരിക്കൻ കവി. 1949 ഫെബ്രുവരി നാലിന് ന്യൂ ഡൽഹിയിൽ ജനിച്ച് കാശ്മീരിൽ വളർന്ന അഘ ഷാഹിദ് അലി, കശ്മീരിലും ഡെൽഹി സർവകലാശാലയിലും വിദ്യാഭ്യാസം പൂർത്തിയാക്കി. 1984ൽ പെൻസിൽവാനിയ സർവകലാശാലയിൽ നിന്നും പി.എച്.ഡി. നേടി. 1985ൽ അരിസോണ സർവ്വകലാശാലയിൽ നിന്നും എം.എഫ്.എ. നേടി. ഇന്ത്യയിലെയും യു.എസിലെയും സർവകലാശാലകളിൽ അദ്ധ്യാപകൻ ആയിരുന്നു.
